سياسة الخصوصية

بياناتك عندنا بنتعامل معاها إزاي

آخر تحديث: ٢٣ أكتوبر ٢٠٢٦

لمسة (lamsa.site) منصة كروت أعمال رقمية. الصفحة دي بتشرح إيه البيانات اللي بنجمعها، وليه، وبنحتفظ بيها قد إيه، وإيه حقوقك. بنلتزم فيها بقانون حماية البيانات الشخصية المصري رقم ١٥١ لسنة ٢٠٢٠.

١. البيانات اللي بنجمعها

بيانات حسابك: الإيميل وكلمة السر. كلمة السر بتتحفظ متشفّرة بطريقة ما ترجعش، ومحدش يقدر يشوفها، ولا إحنا.
بيانات كارتك: اللي إنت بتكتبه بنفسك، زي الاسم والمهنة والصورة والأرقام والعنوان والروابط. دي بتظهر لأي حد يفتح كارتك، لأن ده الغرض من الكارت. ما تكتبش حاجة مش عايز الناس تشوفها.
بيانات الطلب: الاسم والموبايل والمحافظة والعنوان، ولقطة شاشة التحويل لو دفعت أونلاين. بنستخدمهم عشان نأكد الطلب ونشحنه بس.
الإحصائيات: بنعدّ الزيارات والضغطات على كارتك. عشان نعرف «الزوار المختلفين» بنحط كوكي برقم عشوائي، وما بنربطوش باسم الزائر ولا بأي بيانات شخصية عنه.
بيانات تقنية مؤقتة: عنوان الـ IP بيتستخدم لحظيًا عشان نوقف المحاولات الكتير (زي تخمين كلمة السر)، وبيتمسح خلال ساعة.

٢. الكوكيز

كوكي الدخول: بيفتكر إنك مسجل دخول لمدة ٣٠ يوم.
كوكي الزائر: رقم عشوائي للإحصائيات بس.

مفيش كوكيز إعلانات، ولا تتبع من شركات تانية.

٣. مين بيشوف بياناتك

إنت: من لوحة التحكم بتاعتك.
إدارة لمسة: عشان الدعم وتجهيز الطلبات.
مزودي خدمة بنعتمد عليهم: Cloudflare للاستضافة وقاعدة البيانات وتحويل رسائل الدعم، وResend لإرسال إيميلات استرجاع كلمة السر، وGoogle لاستقبال رسائل الدعم على Gmail. بيتعاملوا مع البيانات بالقدر اللازم لتشغيل الخدمة بس.

إحنا ما بنبيعش بياناتك، وما بنديهاش لأي حد للإعلانات.

٤. بنحتفظ بيها قد إيه

بيانات حسابك وكارتك: طول ما حسابك موجود.
بيانات الطلبات: المدة اللازمة لتنفيذ الطلب والمحاسبة.
الإحصائيات: أرقام مجمّعة لكل يوم.
بيانات الزوار المختلفين: بتتمسح بعد يومين.

٥. حقوقك

إنك تشوف بياناتك وتعدّلها في أي وقت من لوحة التحكم.
إنك تمسح الصورة أو أي معلومة من كارتك بنفسك.
إنك تطلب مسح حسابك بالكامل: هنمسحه خلال ١٤ يوم، والكارت هيبطل يفتح صفحتك.
إنك تطلب نسخة من بياناتك.

لأي طلب من دول: ابعتلنا على support@lamsa.site.

٦. الأمان

الموقع كله مشفّر (HTTPS). كلمات السر متشفّرة، وروابط استرجاع كلمة السر بتشتغل مرة واحدة ولوقت محدود. ولمسة الكارت بتفتح صفحتك العامة بس، ومش بتدخّل أي حد حسابك.

٧. التعديلات

لو غيّرنا السياسة دي، هنحدّث التاريخ اللي فوق. والتغييرات المهمة هنبلّغك بيها.